الأحد، 8 مارس، 2009

للفتيات و محاولة لفهم المخلوقات من كواكب أخري

النوت للبنات و الشباب يمتنعون...

لكن يا فتيات بعض النصائح عن المخلوقات المسماه : الرجال

طبعا كلنا بنسائل أسئلة كتيرة اما بندخل في علاقة سواء جدية او هزار أو تثبيت

هنا هديكن " عربي ميكسيد عامي" بعض النصايح المفيدة عشان توفرن علي نفسكن الوقت و تفهموها من قاصرها الا اذا كنتن غاوين تضييع وقت

بما اني شفت وسمعت العجب و لسة هشوف الأعجب من كدةو اسمع اللي مايتسمعش ... فلازم نتبادل الخبرات مع ان مرة واحدة الله يمسيها بالخير ست كبيرة بس صاحبتي قالت لي يا علياء يا حبيبتي اقفلي بقك عشان تتجوزي حكم المخلوق المسمي الرجل ما بيحبش الست الذكية... كنت محتارة دا اطراء و لا شتيمة؟؟!!

بسم الله الرحمن الرحيم.... نبدأ بأول سؤال:

تعرفي ازاي ان العريس المتقدملك لا يصلح؟؟؟
- أما يتقدملك عن طريق حد ما تعرفيهوش كويس اعرفي ان اللي بعتهولك كارهك و عايز يعمل فيكي مقلب
- أما يتكلم كتير أوي أوي عن نفسه و يقوللك أنا بحب المسقعة و مابحبش الفول بالسمنة بحبه بالسدق و انه بيحب يكوي هدومه بنفسه و مايمانعش تكويهاله!!! علي اساس انك وافقتي خلاص!!! و يجيبلك تاريخ عيلته كلها و خيلانه عايشين فبن و عمامه و بيشتغلوا ايه و بيشربوا شاي و لا قهوة؟ كدة يعني... و يقول كووووووول الكلام دا في أول مقابلة.. لو ليكي في الرغي جربي حظك
- لو كنتي دكتورة أو مهندسة و هو مش مهندس و لا دكتور يعد يقوللك يا دكتورة يا دكتورة و يحسسك انك بتتنططي عليه مع انك مافتحتيش بقك من أساسه
- بردو اما تكوني امرأة عاملة و يسألك هو الشغل اللي بتشتغليه دا بيفيدك و بيفيد الناس في ايه؟ يعني اللي هو نظام انتي مالكيش لازمة
- أما يتفحصك طولا و عرضا و أماما و خلفا أكتر من 10 دقايق..
- أما يقول لوالدتك انا نفسي أقوللك ماما من أول مقابلة بردو
- أما تختلفي معاه وشه يحمر غضبا
- أما ما يطلبش رقم موبايلك أو ايميلك ... امال هيجيبهم منين و يتعرفوا علي بعض؟ّّّ!!!!
- أما يبقي انسان بارد و مايتصلش بيكي علي الأقل يوميا يطمن عليكي بكلمة
- أما يعمل تقيل و طبعا دا انسان غبي منه فيه لأن خلاص انت اتقدمت بتتقل علي مين ياهطل
كدة أنا جبت معظم النقط و اللي يحب يضيف يبعتلي أضيف


المجموعة التانية:" بالنسبة للي بيحبوا ما يدخلوش من غير ما يكونوا واثقين أوي انهم مش هيترفضوا مع اني شايفة ان اللي بيدخل من الباب عدل صحيح ممكن يترفض بس شخصية مغامرة و محبة للنضال و وواثق من نفسه أكتر من اللي بيحب يدرس قبل ما يخبط عل باب"

تعرفي ازاي انك بتتثبتي و مش هتطولي لا سما و لا أرض:
- أما يكون فيه حاجة مميزة اتشديتي فيها: خجول أوي – وسيم أوي- حبوب و دايما عامل دوشة في الأعدة- دمه شربات – عاطفي مع اني لا أطيق العاطفية بس في بنات منكوا نفسها حلوة
- أما يبدأ بالملحسة و الفلحسة و السهوكة .
- أما يقول لك كلام حلو كتير أوي أوي من غير ما يستخدم كلمات زي البيت الأولاد الجواز الاستقرار
- أما يجيبلك هدايا نتنة و ماكلفتهوش الا 5 أو 10 جنيه بالكتير بس عشان انتي متثبتة شايفاها كبيرة أوي
- أما يعمل معاكي أحلي واجب في الحنية و الطبطبة
- اما يحس انك اتثبتي يعمل ما يعرفكيش
- أما يثبت اتنين تلاتة ف نفس الوقت و دي طبعا سهلة تلاحظيها و أسهل أما يكون الواد عامل حبيب البنات
- أما تقوليله أنا بحبك يقول لك طب ونا مالي أو طب انتي متأكدة ؟
و طبعا يا قطة فوقي كدة و صحصحي عشان العمر مش بعذئة و اللي تعرفي انه بيثبتك ارميه في التراش ييجي غيره : أبو بلاش مافيش أكتر منه


المجموعة التالتة: يا ريت تركزي
تعرفي ازاي انه بيحبك بجد؟؟؟؟؟
- أما يتكلم معاكي بأدب و احترام و يزنق كلام الجواز و الحب و الأولاد و البيت وسط كلامه
- أما يعمل معاكي أحلي واجب بردو بس مش مستني مقابل و لا الناس تقول له انت هايل و جامد
- أما يكبر دماغه من أي حاجة غبية بتعمليها
- أما تكوني بتستهبلي و بتتدلعي و هو فاهم و قابل
- أما تكون كلمة يا حبيبي عنده بالدنيا كلها و يبقي مش عارف يعمل ايه عشان يسعدك
- أما مايستخصرش فيكي أي أي أي أي أي أي أي حاجة
و طبعا دا تمسكوا فيه بايدكوا و سنانكوا الا لو كنتن فقريين و غاوييين عزوبية أو غاويين نكد لو متجوزين.

أنا كدة عملت اللي علية و عداني العيب و أزح " أزح يعني ايه ماعرفش". و طبعا يا جماعة المخلوقات دي مش مستاهلة أوي تركزي أو تفهمي هما ليه كدة أو بيعملوا كدة.. هتتعبي لأنهم قادمين من كوكب اخر .



مواضيع من نفس التصنيف



هناك تعليق واحد:

  1. نصااااااااايح هايلة
    بس مين يسمع ومين يقرأ!

    ردحذف

ليصلك جديد المدونة

ادخل بريدك الالكتروني