الثلاثاء، 12 فبراير، 2008

ويكي تاني


حاجة كنت عملتها من زمان وتقريبا نسيتها او غفلت عنها بمعني اصح الحاجة هى حملة ويكيبيديا العربية واللى كنت بقول فيها اننا نساعد في تطوير ويكبيديا العربية وبدل ما احنا بنستفيد بس ( دا إذا كان حد بيستفيد من ويكي العربية ) نفيد كمان وكل واحد يدور على حاجة يحاول يترجم ولو جزء صغير اوى منها واللى بعده يكمل واللى يعده تكمل ويكيبيديا العربية وتبقي حاجة نلجأ إليها فى كل وقت محتاجين أي معلومة فى اى حاجة من بوست قديم كتبته زمان فى البلوج القديم بتاعى عن نفس الموضوع

وانا بتكلم مع دروب فروم ذا اوشن الكلام جاب بعضه عن ويكيبيديا وانها مليانة اخطاء كتير فى الترجمات العربية للمقالات وكمان اننا مش بنحاول نصلح الحاجة اللى احنا شايفنها غلط رغم اننا عارفين اننا ممكن نصلحها ، ودى فكرة الويكيبديا اصلا ، ان اللى عارف حاجة يحطها ، واللى شايف حاجة مكتوبة غلط يصححها .. بس للاسف محدش بيعمل كده ، كله بيستفيد بس ، وحتى لما بنفكر نستفيد مش بنلاقى حاجات ، ودا بسببنا احنا ، لو قارنا بين الويكيبديا العربى والويكيبديا الانجليزى .. هنعرف الفرق ، على ويكي انجلش مفيش كلمة تيجى على بالك إلا لما تلاقيها ، لكن على ويكى بتاعتنا ياما دورنا على حاجات مهمة وملقنهاش او لاقينا مقال كلمتين ، وعلشان كدا قولنا نعمل حملة لتطوير ويكي العربية ، كل ماتعرف موضوع وتحس انه مهم، وغيرك هيستفيد لو عرفه ..ادخل على ويكيبديا واكتبه وانشره ، كل ماتدور على حاجة على ويكيبديا عربى وتلاقيها ضعيفه واضطريت تدخل على ويكيبديا انجلش ...ترجم اللى لاقيته وضيفه ، مش هتاخد ربع ساعة وحتى لو اخدت ربع ساعة المرة الجاية هتلاقي اللى انت عايز تستفيد بيه موجود قدامك من غير ما تتعب .
عيب لما نلاقى كل المقالات العربى مكتوب عليها(هذا المقال لا يطابق معايير ويكيبديا)
او نلاقى (هذا المقال بذرة بحاجة للنمو)

ياريت نبقى ايجابين ، ونخلى ويكيبديا العربى ، تبقى شجرة معرفة كبيرة .. نستفيد منها كلنا
يللا كلنا نويكى بالعربى
دا الكلام بتاع البوست القديم ومنه هتوضح الصورة اكتر منه واللى عايز اقوله على رأي كلمتنا يا ريت نبقي بوسيتيف أو +ve
زى ما بيحبوا يكتبوها
يا ريت نبص هنا ونشوف الفرق بين ويكي العربي وويكي الانجلش

دا نتيجة بحث الويكيبيديا العريبة عن كلمة يوتوبيا
من هنا

ودي نتيجة البحث عن نفس الكلمة بالانجليزي
من هنا
حاجة لسه مفكر فيها دلوقتى نتيجة البحث عن نفس الكلمة فى ويكيبيديا العبرية
من هنا

يا ريت كدا نفكر ونشوف الفرق بين التلاتة بجد منظر يكسف جدا ويضايق قد ايه الفرق شاسع بين التلاتة العربية فيها كام سطر العبرية فيها اكتر بس مش قوي يعني على الاقل فيها حاجة مفيدة الانجلش فيها كل حاجة

جيت احسيبها بطرقية عدد المتكلمين باللغة حول العالم لقيت يمكن الانجلش ليه ناس كتير بتتكلم بيه وعلشان كدا مليانه ويكي الانجلش بالمعلومات طيب والعربي ؟؟؟؟ بالتأكيد اكتر من متحدثي العبرية حول العالم يعني المفروض بنفس المقياس نلاقي ويكي العربية احسن
لكن للأسف دي مش الحقيقة

لكن المقياس الصح ان احنا كسلة ( وأنا اول واحد ) الكسل بيجري فى عروقنا مجري الدم وبنعمل بس علشان مصلحتنا الشخصية اخد المعلومة اللى نفسي فيها واجري ومش مهم بقي باقي الدنيا تضرب تولع انا مليش دعوة انا اخدت اللى عايزة ولو ما بطلناش نقول كدا عمرنا ما هنحقق حاجة وهنفضل على طول محلك سر وهنفضل نعتمد على الاخر علشان يجيبلنا كل حاجة لحد عندنا وكل حاجة دي تشمل المعلوماتية برضو
كنت بكلم رامي " مستر برويد " وقالى على ان الويب اتنين محدش عربها ( عملها تعريب يعني ) غير شوية قليلين يتعدوا على صوابع الايد الواحدة ( وهو منهم على فكرة ) ولسه الناس عايشه بويب واحد
مقصدي من الكلام اننا نبدأ بنفسنا ما نستناش حد يطلعنا لقدام لا كل واحد يتحرك ويعمل اللى عليه ( ويا سلام لو يعمل اكتر ) علشان نبقي فعلا بنعمر الارض ونبقي منتجين مش بس مستهلكين لما تجود بيه يد الأخرين

اتمني تكون رسالتى وصلت واتمني كمان اننا ما نكونش سلبيين وكل واحد يبدأ بنفسه

*******************
اللى فكرني بالموضوع حوار مع frakeghost

تحياتى
تشي



***********************************************
تحديث : ازاى نعدل فى ويكيبيديا
هنبدأ فى الموضوع دا مثلا عن اليوتوبيا واللى هو صغير جدا
الموضوع مكتوب تحته
هذه بذرة مقالة عن شخصيات أو مصطلحات متعلقة بالفلسفة تحتاج للنمو والتحسين؛ فساهم في إثرائها بالمشاركة في تحريرها.
فى اعلي المقال ومن ناحية الشمال هنلاقي كلمة ( عدل هذه الصفحة ) زى اللى فى الصورة هندوس عليها ودي هتنقلنا لصفحة التحرير ::

ودي بتبقي موجودة فى جميع صفحات ويكيبيديا وكل المواضيع
دا هيودينا لصفحة التعديلات او التصحيحات على الصفحة اللى احنا عايزين نغير فيها
وعلشان الناس اللى لسه هتتعلم ويكي عامله صفحة ومسمياها ساحة اللعب علشان الناس تجرب فيها

ودي ندخلها من هنا علشان نجرب فيها


فى الصفحة دي واللى بتبقي موجودة فى كل المواضيع فى ادوات علشان تقدر تتعامل مع النص اللى انت بتعمله وعندك مكان الكتابة كمان ودا اللى بنكتب فيه ومن فوق ادوات التنسيق زى المنتديات والبلوجر تقريبا لكن ويكيبيديا التعديلات فى التنسيق ما بتظهرش مباشرة لكن بتتكود وبتظهر فى الاخر خالص لما تعمل حفظ

نشوف بقي الادوات واستعمالها
الاداة دي معروفة طبعا ودي علشان نعمل الخط بولد او عريض يعني ولما بندوس عليها ما بيظهر تأثيرها بس ويكي بتحط كود على الحاجة اللى احنا معلمين عليها ( مظللينها يعني ) والكود بيترجم بعد كدا فى الاخر خالص

الاداة دي كمان معروفة ودي علشان تعمل الكلام مايل
****
والاداتين دول مهمين جدا فى ويكي الخط العريض او البولد بيستخدم لما نكون هنعرف حاجة معينة يعني مثلا لما نيجي نعرف اليوتوبيا مثلا :
اليوتوبيا : لفظ بطلق على مدينة افلاطون الفاضلة
أما الخط المايل فدا بيكون علشان تنسيق اسم الكتب والأفلام والمسرحيات والالعاب يعني مثلا :

شفرة دافنشي واحد من اهم كتب دان براون واشهرهم على الاطلاق
****

الاداة دي بقي وظيفتها انهابتضيف بحث على الكلمة اللى احنا بنظللها وعلشان يوضح الكلام لو مثلا فى المثال اللى فوق

شفرة دافنشي واحد من اهم كتب دان براون واشهرهم على الاطلاق

احنا عايزين نعمل كلمة دان براون لما حد يدوس عليها يتنقل اوتوماتيكيا لصفحة دان براون فى ويكي او ع الاقل يعمل بحث عنها ويوديه لنتيجة الوحيدة او يعرض عليه النتائج ودا اللى بنشوفه فى الويكي الكلام اللى متعلم بالازرق ودي بيكون معناها معلومات عن الحاجة المعمولة بالازرق دي
ودي طريقتها بتكون اننا بنختار الكلمة دان بروان مثلا لما ندوس على العلامة دي هتبقي الكلمة بالشكل دا
[[دان براون]]
لكن لو عايزين نخلي الكلمة تروح لصفحة غيرها فى ويكيبيديا يبقي هنعمل الكود دا [[روايات عربية|روايات]] ودا لازم نضيف العلامة " | " دي ( ودي بتيجي باننا ندوس (شيفت +\) والكلمة التانية بنفسنا بالطريقة دي هتظهر كلمة روايات عربية واللى يدوس عليها يروح لصفحة روايات فى ويكيبيديا

الاداة دي لإضافة رابط او لينك للكلام بس خارج ويكيبيديا يعني برضو فى المثال اللى قبل كدا

شفرة دافنشي
واحد من اهم كتب دان براون واشهرهم على الاطلاق

لو انا عايز اعمل كلمة دان براون لينك لموقعه الرئيسي مش لصفحته فى ويكي هستخدم الاداة دي

لما ادوس عليها هلاقي الكلمة بقت بالشكل دا [دان براون] وبعدين نيجي احنا بقي ونضيف الرابط
[ دان براون http://danbrown.com]
مثلا يعني وبكدا يبقي اللى يدوس على الكلمة تظهر الصفحة danbrown.com

دي علشان نعمل خط كبير ودي غالبا بتكون لعنوان حاجة معينة
دي اداة إضافة الصور ودي ارخم حاجة فى الويكيبيديا ومحتاجة وقت كبير واللى مهتم بإضافة الصور يقري الصفحة دي
من هنا
دي اداة علشان لو فى كلمة معينة وعايزين نعمل بحث عن ملفات فيديو او صوت مرتبطة بيها بنختارهه يعني مثلا لو عاملين موضوع عن الدورة الدموية وعايزين اللى بيقري يشوف لو في فيديوهات عن الدورة الدموية داخل ويكي هنعلم على الكلمة وبعدين ندوس الاداة دي وهتظهر بالشكل دا واحنا بنكتب [[ميديا:الدورة الدموية]] وبكدا يقدر اللي بيقري يعرف اكتر عن الحاجة دي

بقية الادوات فيها اداة للإضافة المعادلات الرياضية واداة لعمل الكلام باهت كتعليق على الموضوع نفسه واداة ترقيم واداة لعمل نقط عند بداية كل سطر واداة علشان تضيف خد افقي كفاصل يعني واخر اداة اداه الجدول واللى بندوس عليه بيظهر مربع يطلب منك تدخل عدد الاعمدة والصفوف اللى عايزها فى الجدول


*************
اخر حاجة عايز اقولها ان كل الادوات دي مش محتاجين منها غير اداتي البلود والمايل علشان هما دول الاكثر استخدام فى الويكي ومش لازم نضيف كل حاجة بس لما نضيف حاجة معينة نضيفها بتنسيق كويس العنوان بولد او عريض واسماء الكتب والافلام بخط مائل
وفى اخر الصفحة هتلاقي حفظ التعديلات هتدوس عليها علشان يتم الحفظ
واللى عايز يشوف اكواد ويكيبيديا لو يحب يكتب بالاكواد هيلاقيها هنا
بس كدا
دا ازاى نضيف او نحرر فى الويكيبيديا بس يا رب الناس كلها تحاول تبقي إيجابية وتعمل حاجة

مواضيع من نفس التصنيف



هناك 7 تعليقات:

  1. كلام جميل
    انا دايس يا معلم ان شاء الله

    ردحذف
  2. ايه ده انت ازاي طلعته فوق تاني؟؟
    حلوة الحركة دي

    وبالنسبة للموضوع انا لسه بتعلم ازاي اضيف مقالات في الويكي اهوه

    ردحذف
  3. ايه ده انت ازاي طلعته فوق تاني؟؟
    حلوة الحركة دي

    وبالنسبة للموضوع انا لسه بتعلم ازاي اضيف مقالات في الويكي اهوه

    ردحذف
  4. السلام عليكم
    ازيك تشى
    ازيك ليثى
    ازى كل المدونين اللى اتجمعوا علشان يحققوا الحلم ده
    مين عارف ممكن تنوحد فى حاجه اخيرا وعلى رأى تشى نطالب بنقابه ونطالب بحقوق وتامينات ودوله جو الدوله
    .....
    ان شاء الله معاكوا وهنحاول نعمل حاجه تتكتب لينا
    انا بقيت ساجى تانى يا تشى مش
    frakeghost

    وربنا يجازيك خير

    ردحذف
  5. دى معلومات عنى ويسعدنى تلبيه الطلب
    والإنضمام لمجموعه الشباب الواعى ده
    السلام عليكم ورحمه الله وبركاته
    الاسم ..ساجى
    المدونه
    45 يوم
    www.45days-repentance.blogspot.com

    و خزعبلات مشتته
    www.frakeghost.blogspot.com

    تقبلوا تحياتى واحترامى
    وان شاء الله نحقق حلمنا سوا

    ردحذف
  6. ليثي
    بص انا طلعته تاني بعد الاضافة الاخيرة والتحديث اللى فى البوست وازاى نضيف مقالات او نعدل ونحرر

    اتنمني يكون البوست مفيد واتمني نكون كلنا ايجابين

    تحياتى
    تشي الحزين

    ردحذف

ليصلك جديد المدونة

ادخل بريدك الالكتروني