الثلاثاء، 1 أبريل، 2008

امرك مطاع يا سيد الانطاع

بسم الله الرحمن الرحيم

((الرِّجَالُ قَوَّامُونَ عَلَى النِّسَاءِ بِمَا فَضَّلَ اللَّهُ بَعْضَهُمْ عَلَى بَعْضٍ وَبِمَا أَنْفَقُوا مِنْ أَمْوَالِهِمْ فَالصَّالِحَاتُ قَانِتَاتٌ حَافِظَاتٌ لِلْغَيْبِ بِمَا حَفِظَ اللَّهُ وَاللَّاتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ فَإِنْ أَطَعْنَكُمْ فَلَا تَبْغُوا عَلَيْهِنَّ سَبِيلًا إِنَّ اللَّهَ كَانَ عَلِيًّا كَبِيرًا))

صدق الله العظيم
*****

طبعا اغلبنا اذا مكانش كلنا عارفين الآية الكريمة، وناس كتير بتحب تستشهد بيها مع اى خلاف بين زوجين، او اى مناقشة فى موضوع المساواة بين الراجل والست اللى مش عايزين يرحمونا منه، بس يا ترى ايه هو المعنى الحقيقى للقوامة؟؟ وايه هو وجه التفضيل للراجل عن الست علشان يقوم بهذه المهمة؟؟؟

*****

القوامة بأبسط معانيها هى تحمل الرجل لمسئولية اسرته ماديا ومعنويا، وانفاقه على المسكن والمأكل والمشرب، ورعايته لافراد اسرته، بالظبط زى حديث الرسول عليه الصلاة والسلام (( كلكم راع وكلكم مسئول عن رعيته )) ، والمسئولية اكيد لا تتجزأ
اما بقى عن تفضيل الرجل للقيام بهذه المهمة ، فمش علشان عضلاته ولا الشنب اللى فى وشه، لكن لوجود عبادات يُكلف بها الرجل دون المرأة ، زى الجهاد والصلاة فى المسجد وفى جماعة وغيرها ، وانا عن نفسى شايفاه نوع من التكريم للمرأة انها تقعد كده معززة مكرمة، والافندى بتاعها يقوم بكل طلباتها

*****

كل اللى فات ده جميل ، لو موجود وبيطبق صح، لكن للاسف الواقع بقى غير كده، يا ترى حد يعرف فى مصر كام اسرة تعولها ست؟؟ أو بمعنى تانى كام امراة معيلة؟؟

*****

المرأة المعيلة يندرج تحتها عدة انواع ، الارملة والمطلقة و زوجة المسجون والمريض والغائب و اللى موجود وعامل مستعبط
بالنسبة للارملة وزوجة المسجون أو المريض ، فالراجل فى الحالة دى مش بيمتنع عن الانفاق بمزاجه ، دى ظروف ممكن تواجه أى اسرة، وبيبقى شئ عظيم ان الست تتحمل مسئولية الاسرة فى الظروف دى

*****

المصيبة الكبيرة بقى فى حالة الست المطلقة اللى رافض طليقها يصرف على عياله أو سابهم وطفش ومش عارفين طريقه ، يعنى سيد الرجالة تخلى عن مسئوليته بمزاجه وكيفه، والست فى الحالة دى بتبقى مجبر اخاك لا بطل، يا تنزل تشتغل يا تموت هى وعيالها من الجوع

*****

أما المصيبة الاكبر والاعظم ان يكون الراجل عايش ، وموجود فى بيته مش طفشان، وصحته زى الثور يتبنى على كتافه بيت، ومع ذلك عايش مستنطع على مراته، واسفة على اللفظ لكن حاولت ادور على تعريف للراجل اللى عايش عالة على مراته ملقتش فى قاموسنا العامى كلمة اشد من كلمة (( نطع ))
الراجل من دول يبقى نايم فى البيت ، ومراته نازلة تشتغل ،مش مهم عنده بتشتغل ايه، المهم ترجع معاها فلوس وسجاير واكل، وفوق كل ده ياويلها لو فتحت بقها او اشتكت الافندى بتاعها ، أو عابت فى سيد الرجالة اللى مهنيها، والمطلوب منها بعد كل ده انها تقوله ((امرك مطاع يا سيد الانطاع ))

*****

نوعيه الرجالة دى موجودة ومنتشرة فى المناطق الفقيرة والعشوائية من زمان ، لكن المصيبة انها بدأت تظهر كمان فى الطبقة المتوسطة، ومش شرط يكون الراجل عاطل ، بالعكس ممكن يكون بيشتغل هو ومراته ، لكن مش عايز يصرف مليم على البيت أوعلى ولاده، والكلمة اللى عنده (( وانتى فلوسك فين)) ، وده مش بخل اد ما هو استنطاع، لانك ممكن تلاقيه راح صرف الفلوس دى على نفسه أو على واحدة تانية، ومعتمد ان مراته طالما بتشتغل يبقى لازم تصرف فلوسها كلها فى البيت

*****

أنا مش عارفة هل المشكلة ان الناس دى مش فاهمة دينها صح ، ومش عارفة يعنى ايه قوامة أو ذمة مالية مستقلة للمراة، ولا ده عيب تربية، ولا عيب بيئة ومجتمع ، بصراحة مش قادرة احدد ، كل اللى اعرفه ان
حكايات الستات الشقيانة كتير جدا، وكل يوم العدد بيزيد، ومفيش قدامهم غير الصبر على ظل خيال الماتة اللى فى حياتهم

*****

اما انت ايها النطع عقبال ما تُساق ان شاء الله الى النطع (بساط من الجلد كان يقتل فوقه المحكوم عليه بالقتل) ، فلو حكمونى عليك وعلى امثالك ، لحكمت عليكم بالاعدام فى ميدان عام رمياً بالبُلغ ، لكن للاسف مفيش بُلغ حتكفى عددكم
واهـــــــــــــــو ده عيبـــــــــــــــــه

مواضيع من نفس التصنيف



هناك 3 تعليقات:

  1. أحييكم على النشاط الجميل وأود المشاركة معكم
    إيهاب رضوان
    tootmahrook_99@hotmail.com
    مدونتى
    http://dakhalelsheta.blogspot.com

    ردحذف
  2. صعب قوى نموذج الراجل النطع ده ..فعلا مأساة بكل المقاييس و اللى محيرنى ازاى راجل يقبل على نفسه وضع زى ده..الموت اهون بصراحة..و يكون ايه منظره قدام اولاده و هو بيمد ايده ياخد مصروفه من امهم و ايه انعكاس ده على نفسية الاولاد دول لما يكبروا

    و لا حول و لا قوة الا بالله

    تحياتى

    ردحذف
  3. بسم الله الرحمن الرحيم
    ما شاء الله كلام جميل ومؤثر ومعبر و تقريبا هو ده حال معظم او اكثر من 50% من المسلمين و ده طبعا سبب لنا الكثير من المشاكل والمصائب التى ادت الى انتشار العنف والسرقة والزنا والانحراف بشكل عام، بس مش مهم عندى وجود مشكلة زى دى بيننا .. الاهم هو ان المسلمين يكونوا مقتنعين فعلا بهذا الواقع .. لان الاعتراف بالمشكلة او بوجودها يحسم او يجاوز نصف الحل ... لكن للاسف معظم الانطاع - على فكرة هذا الاصطلاح استخدمه دائما على هذه النماذج المذكورة بالتفصيل فى معظم حواراتى ومداخلاتى وكتاباتى - المهم ... المشكلة ان معظم الانطاع مش حاسين بنفسهم فاهمين ان ده تطور للحياة ودى شيء طبيعى ، وهم لا يشعرون ان هذا تراجع وتخلف وعودة الى الوراء وجاهلية بمعنى الكلمة تماما ... عموما نتمنى ان يعود هؤلاء الانطاع الى وعيهم ثم الى انفسهم ثم الى دينهم ثم الى واجبهم ثم الى دورهم حتى يستقيم الحال ونعود للسيطرة والهيمنة عالميا

    ردحذف

ليصلك جديد المدونة

ادخل بريدك الالكتروني