حوار إفتراضى مع صديقى المغترب

تنـويه: الحوار اقرب إلى مناقشة مع الذات منه اى حوار بين شخصين

انا: بس قول لى بصراحة هو الواحد لازم علشان يحقق حاجة يسافر و يتغرب

صديقى: ما انت اهو على ايدك شايف حال البلد عامل ازاى هو الواحد بيسافر و لا بيتغرب بمزاجه الا اذا كان حال البلد اللى يصعب ع الكافر هو اللى بيدفعه لكده

انا: ايوة يعنى بس هو حل المشاكل اللى فى البلد ان انا اهرب من مواجهتها و اروح اتغرب فى بلد تانية

صديقى: يا حبيبى بلدنا دى خلاص ما بقتش بتاعتنا و لا لينا و الفساد و المشاكل اللى فيها و صلت لنقطة اللاعودة فما تقوليش يعنى ان انت االى خايف ع البلد و عايز تصلحها لوحدك

انا: ياباشا انا مش قصدى اصلحها لوحدى ولا حاجة انا قصدى بس اعمل اللى عليا و بعدين ماهى اى بلد هنسافر لها هيكون فيها مشاكل برضه الفرق بس ان انت مش هتكون ابن البلد دى هتكون متغرب و كفاية عليك غربتك...فمش هتحس بمسئولية او رغبة فى مشاركة فى حل مشاكل البلد اللى انت فيه

صديقى: يابنى انت عبيط و لا ايه؟.... معنى كلامك انى اتخلى عن حياتى و احلامى فى انى اتجوز و اكون اسرة و يبقى لى حياة كريمة و اندر نفسى بقى لحل مشاكل البلد و السعى لتغييرها..او اجل احلامى لحد ما البلد حالها يتصلح..وبعدين مانا متغرب جوا بلدى اساسا و حاسس انى مش لاقى نفسى ولا عارف احقق ذاتى.. يبقى ايه الفايدة من الاستمرار هنا؟..لا يا حبيبى انا اروح بلد بتقدر قيمة الشغل و العمل ..بلد لما ابذل فيها مجهود الاقى عائد و اقدر احقق ذاتى و اكون نفسى

انا: بس برضه الغربة مش حل..انت بره مش هتلاقى كرامتك و المصريين بيلاقوا معاملة وحشة جدا بره زى مانكون بنشحت منهم

صديقى: هاهاهاهاهاها...كرامتك مين يابو كرامة...هو انت لاقى كرامتك هنا اصلا..خش كده اى قسم...روح اى مصلحة حكومية..طب بلاش اركب مواصلات عامة كده ..او كل رغيف عيش...و ابقى قولى اخبار كرامتك ايه..طب بلاش ادينا انا و انت مهندسين اهو و زى الفل...تقدر تقول لى ممكن من ساعة ما تتخرج تشتغل شغلة تقدر تتجوز و تجيب شقة منها خلال قد ايه؟ .. مش برضه من حقنا ومن كرامتنا اننا نشتغل فى مجالنا ع الاقل ونقدر نتجوز من غير مساعدة من اهلنا بعد ما صرفوا علينا دم قلبهم فى التعليم

انا: قد كده انت شايل من البلد و كارهها انت مش مصرى يابنى ولا ايه الدم اللى بيحرى فى عروقك ده ايه؟

صديقى: لا انت فاكر انى بكره مصر..... لا و الله .. ربنا هو العالم قد ايه انا بحب البلد دى و اسكندرية دى حتة منى و حازز فى نفسى قد ايه البعد عنها .. بس انا مش عايز اوصل لمرحلة انى اكره البلد لما ظروفها السيئة تدوس عليا و افشل فى تحقيق احلامى...و اوصل اربعين سنة و انا ماعملتش حاجة..احسنلى اسافر دلوقتى وانا محتفظ ببقايا الصورة الكويسة للبلد اللى فى دماغى و قلبى

انا:يعنى خلاص ما فيش فايدة

صديقى: اسمع منى...فرصة كويسة فى اى بلد عربى و يا سلام لو قدرت تقدم منه على طلب هجرة لبلد اوروبى او كندا او استراليا

انا: و كمان هجرة.. ده انت مش عايز ترجع البلد تانى بقى

صديقى: ارجع اعمل ايه يا حبيبى؟ و بعدين مافيش حد بيسافر بره و بينجح و يرجع تانى.... انت عارف مشكلة مصر الاساسية ايه؟

انا: ايه ؟

صديقى: مشكلة المصريين انهم مش كويسين مع بعض..حتى بره مصر..حط المصريين كده مع بعض فى فريق عمل لأى شىء و اتفرج عليهم هيحاربوا بعض إزاى....لكن لو كل واحد فيهم اتحط لوحده فى فريق اجانب شوف كم الشغل اللى هيطلعه

انا: ده انت كمان بتعيب فى المصريين نفسهم..للدرجة دى نظرتك تشاؤمية و سوداوية للبلد

صديقى: اسمع منى بس و ماتضيعش وقتك

انا: طب ابقى شوفلى معاك حاجة بره بقى هابقى ابعتلك الـسى فى بتاعى ع الميل

صديقى: عنيا عشانك يا باشا

انا: تعيش

انتهى

مواضيع من نفس التصنيف