السبت، 5 أبريل 2008

أقرأ .. تكون



أقرأ ... تكون ؟؟ يعني أيه وليه ؟؟
أقرأ اول تكليف نزل على سيدنا محمد عليه افضل الصلاوات وهو واحد من الحاجات اللى اصبحنا بنفتقدها فى وطنا العربي ومصرنا الجميلة بالأخص بقيت تشوف كل شاب وشابه ماسكين الموبايل بيلعبوا فيه او فى ودانهم الام بي ثري وبيسمعوا اغاني او بيهزروا مع بعض أو ..... كلها حاجات مهما كانت هى ايه لكنها فى الاخر تضيع وقت ع الفاضي
لكن لو جينا بصينا مين ماسك كتاب ( مش بتاع المدرسة والكلية ) كتاب فى اى مجال بيحبه وبيقرا فيه ، لا يمكن دي رابع المستحيلات عند العرب ، ولو جينا بصينا كدا ولقينا واحد ماسك كتاب وبيقرا فيه الباقي مش هيسيبه ::::
" أيه يا عم المثقف "
" ايه الثقافة دي كلها "
" فين النضارة بتاعتك "
إلى اخر التعليقات المستفزة اللى تخلي الشخص يحرقهم ويحرق الكتاب ويحرق نفسه بالمرة معاهم

نرجع لموضوعنا بقي " القراءة " انا عن نفسي شايف ان القراية واحدة من اهم الحاجات اللى لازم نهتم بيها لازم زى ما بنقلد الغرب فى كل حاجة فى الهدوم والمزيكا والكلام نقلدهم بردو فى الحاجات الكويسة يعني فى الغرب اغلب اوقات الفراغ فى الكليات والمواصلات العامة الناس بتستغلها علشان تقري والقراية بوجه عام فى اي مجال حسب الشخص اللى هيقرا هتفيد الشخص وهتوسع عقله وتفكيره وهتخليه يعرف حاجات اكتر ومعلوماته هتزيد

فى مصر هنا كمية السطحية بين الشباب تخلي الواحد محتاج يركز شوية " هو انا هفضل زى الناس كلها كدا هما ضايعين يبق انا زيهم وهو انا احسن منهم فى ايه " لا اكيد ممكن نكون احسن من اللى حوالينا ربنا سبحانه وتعالي قال " وإن تتبع أكثر من فى الأرض يضلوك " يعني مش علشان كل الناس مش بتقري يبقي انا موجعش دماغي والرسول عليه الصلاة والسلام قال " لا تكن إمعه إذا أحسن الناس احسنت وإذا اساءوا اسئت " من الحديث والأية الكريمة بيوضح اوي اننا ماينفعش نمشي ورا الناس فى كل حاجة وفى اى حاجة ولازم يكون لينا موقف خاص وفكر خاص ودا مش هيجي غير بأننا نقرا ونفهم وننقد وناقش

ولأن دلوقتى معيار الانسان بيعرف قد ايه مش معاه كام ( دا عند الناس المحترمة اللى مش كل همها الفلوس )

وعلشان دا كله وحاجات تانية كتييييييييير انا يمكن معرفهاش
لازم نقرا ..
علشان كدا عملت الحملة والجروب
أقرأ ... تكون
أقرأ علشان تكون إنسان يحترم وليه فكره وثقافته الخاصة مش ماشي ورا الناس وخلاص وهو مش عارف حاجة

ياللا كلنا نقري نتعاون ونجيب الكتب مع بعض واللى عنده يدي اللى معندوش علشان كلنا نقري ونفهم ونعرف
ياللا كلنا نكون ........

مواضيع من نفس التصنيف



هناك تعليق واحد:

  1. اوافقك الراى و اؤيدك تماما....المعرفة هى اهم معيار لاى شخص ززالمعرفة تغير نظرتك للحياة و القراءة من اهم مصادر المعرفة..اضم صوتى لصوتك و احييك على الحملة فى زمن اصبحت فيه التكنولوجيا هى التى تسييرنا و لسنا نحن الذين نسييرها و اصبحت ثقافة المرئى و المسموع طاغية على ثقافة المقرؤ و ان كانت غير دقيقة او مغلوطة

    تحياتى

    ردحذف

ليصلك جديد المدونة

ادخل بريدك الالكتروني