الخميس، 24 أبريل، 2008

هنا القاهرة

ضحكت جدا حتى استلقيت على قفايا زى ما بيقولوا لما سمعت قرار الرئيس مبارك بتحويل حلوان و 6 اكتوبر الى محافظتين مرة واحده، يعنى مش مدينة مثلا بمجلس محلى وكلام من ده ، لا محافظة كده بمحافظ ومدير امن وميزانية مستقله وحدود جغرافية وكود تليفون مباشر وكارتة طريق وكل ما تحمله كلمة محافظة من معانى سامية!!!

*****

اسئلة كتير دارت فى عقلى ، اشمعنى دلوقتى يعنى ؟ وليه حلوان و6 اكتوبر بالذات؟ وهل من الطبيعى انهم يتساووا بالاقصر اللى بقالها قرون مجرد مدينة تابعه لمحافظة قنا رغم قيمتها السياحية والتاريخيه واخيرا حن قلبهم عليها وهيحولوها محافظة!!!

*****

طبعا حيتقال ان الهدف هو القضاء على المركزية والتكتل، والقدرة على خدمه المواطنين بشكل افضل، وكل الكلام الجميل ده اللى بنسخسخ لما نسمعه ، لكن بيتهيالى وجود 26 محافظه قبل كده لا لغى المركزية ولا قلل التكتل فى القاهرة ، ولاوفر على المواطن انه ينزل القاهرة علشان يقضى مصالحه

*****

لو بصيت من وجهه نظر اى مواطن اقاليمى زيى هتكتشف ان علشان تلاقى شغل محترم يبقى تدور فى القاهرة، عايز تتفسح وتغير جو يبقى تنزل القاهرة ، تعبان لا قدر الله وعايز دكتور كويس او مستشفى محترمة يبقى مفيش غير فى القاهرة، موهوب فى الادب او الفن او حتى الكورة مش حتلاقى فرصتك غير فى القاهرة

*****

والكلام ده الواحد بيحسه وهو موجود فى محافظة على الوش شوية وفيها الى حد ما خدمات كويسة، امال بقى الناس اللى فى الصعيد والواحات والبلاد اللى يتركبلها الافيال تعمل ايه ، وهل كتر المحافظات ده هيريح الناس يعنى ويخليهم يبقوا مكتفين ذاتيا ويستغنوا عن القاهرة الوحشة اللى بتاكلهم زى النداهه؟؟

*****

انا بقى لقيتلكم الحل اللى هيريح كل الناس فى كل المحافظات ، احنا كل اسبوع كده ولا اسبوعين ننقل رئاسة الوزراء بالوزارات بمجمع التحرير ودار الاوبرا وساقيه الصاوى والاذاعة والتليفزيون والهرم والمتحف المصرى وكمان القصر العينى ومستشفى السرطان والجامعه ، ولو فى امكانية نضيف وسط البلد وشارع جامعه الدول وعباس العقاد وسيتى ستارز وكام مول كده على كام شركة استثمارية كبيرة ونلف بيهم على كل محافظة مرة ، واللى ليه مصلحه او حاجة عايز يعملها ولا نفسه يشوفها يعرف القافله دى جاية بلده امتى ويحجز من قبلها وطبعا الكلام ده باولوية الحجز

*****

اما اذا تعذر هذا الحل لا قدر الله لمشاكل تقنيه ففى حل احسن ، احنا نمسك القاهرة الكبرى ونطلع كل الناس اللى فيها فى الصحرا بحاجتهم وعفشهم ، ونغسلها غسلة حلوة كده بالمايه والمسحوق ومفيش مانع من استعمال الكلور، ونقوم جايبين اى حاجة مهمه فى اى محافظة ونحطها يعنى هناخد مثلا قناه السويس ومعابد الاقصر وبحر اسكندرية وشاليهات الساحل حتى جبل المطاريد بتاع الصعيد، ونحطهم كلهم فى القاهرة ، ونوسع حدودها الجغرافية حتى تشمل المليون كم2 اللى حيلتنا ، وبكده يبقى كل الناس عايشين فى القاهرة ومحدش احسن من حد، وفى نفس الوقت مش هيوحشهم اى حاجة من اللى اتعودوا عليها

*****

عموما انا قلت الحلول اللى عندى وعليكم تختاروا اللى يناسبكم، ولغاية ما تقرروا انا قايمة اتصل بشركة ال dsl علشان فيه مشكلة ،اصل الشركة هنا قالتلى العيب مش مننا ، العيب م القاهرة !!!!
واهــــــــو ده عيبــــــــه

مواضيع من نفس التصنيف



هناك تعليق واحد:

  1. العزيزةصباحالخيرطبعامعاكيحقفيإنلابدمنتدعيمالخدمات في الأقاليم..لكن أصل الدنيا بقت متلخبطة كله عايز يبقي زي القاهرة..طيب القاهرة دي عاصمة إدارية..والساكنين فيها ( أاقصد المجاورين) عايشين بيشوفوا حلوها و مرها..فين النهاردة الأرياف بانتاجها الجميل و جوها الأجمل مافيش..علشان عايزين يبقوا زي القاهرة..لما القاهرة اتخنقت وبقت أسوأ مدينة في العالم من حيث التلوث..يعني لا ناسها ولا ناس القاليم استفادوا..أما قرار محافظة حلوان فده لابد كان يتخذ من زمان لأن دي أماكن مترامية الأطراف تحتاج لإشراف مباش..وإيه يعني لما يتوفرلها التليفون و المحافظ وخلافة..ماهو ده المطلوب علشان ماتبقاش خدماتهم محملة علي القاهرة الي حاتموت من الضغط اللي عليها..تحياتي ليكي

    ردحذف

ليصلك جديد المدونة

ادخل بريدك الالكتروني