الأربعاء، 16 أبريل 2008

لو لمبة الكهرباء إتحرقت ..شعوب الدنيا تتصرف إزاي...؟؟؟؟


من بريد إليكتروني و صلني من السعودية ..و حبيت أصدقائي يقرؤه

ولو إن صاحب البريد لم يقل لنا لما اللمبة تتحرق في السعودية بيعملوا إيه !!!!!!


الإجابة البديهية: إن الناس هتغيرها طبعاً!!

لكن ثبت بالتجربة إن الإجابة دي مش وافية لأن تصرف الناس مع اللمبة هيختلف حسب مكانهم وثقافتهم

فى العراق

لما ناس بتتحرق فى بيتهم لمبة بينزلوا يخطفوا أول أجنبي يقابلوه ويطلبوا من بلده تبعت لمبة جديدة مع واحد يغيرها علشان يفرجوا عن المخطوف

فى إنجلترا
لو واحد اتحرقت فى بيته لمبة بيتصل بمندوب حلف الأطلنطى علشان ياخد إذن بتركيب لمبة جديدة
فى الصين

لما واحد بتتحرق فى بيته لمبه، بيدخل كل البيوت اللى فى شارعهم ويبص تحت السلم، لحد ما يلاقى السلم اللى فيه ناس قاعدة تحتيه بتصنع لمبات، ياخد منهم لمبة علشان يغيرها، ويديلهم بدالها ساعة من اللى هو بيعملها تحت السلم فى بيته
فى اليمن

لما واحد بتتحرق فى بيته لمبة بيقعد يخزن قات (حاجة كده زي الحشيش عندنا بس هما بيزرعوها) لحد ما يبقى شايف إن اللمبة اتغيرت لوحدها
فى الخليج

لما واحد بتتحرق فى بيته لمبة بيطلب من الشغالة الفلبينية إنها تبعت السواق الباكستانى يجيب صنايعى هندى يغير له كل اللمبات اللى فى البيت

فى لبنان
علشان واحد يغير لمبة محروقة لازم واحد تانى يولعله الأرجيلة (الشيشة) وواحدة تغنى للإتنين وواحد ينزل يجيب معسل وسجاير للتلاتة علشان كله يعدل مزاجه قبل الشغل فى اللمبة

في ليبيا

لو اللمبة اتحرقت بيراجعوا الكتاب الأخضر ويشوفوا فيه تعليمات تغيير اللمبة فى الجماهيرية العربية الليبية الشعبية الاشتركية العظمى
فى الصومال

لما لمبة بتتحرق ماحدش بينتبه للموضوع علشان ماعندهمش كهربا أصلا فى المغربلما لمبة بتتحرق فى بيت واحد بيروح مسافر فرنسا يشتغل فى المينا هناك أسبوع ويرجع بكرتونة لمبات فى إيده
فى إيران

لما واحد بتتحرق فى بيته لمبة كهربا بيخرج ينضم للمظاهرات علشان يطالب بحقه فى لمبة نووية

فى سوريا
لما بتتحرق لمبة بيعملولها استفتاء وتطلع النتيجة إن اللمبة شغالة بنسبة 99.999% ويعملوا احتفال قومى للوصول للنسبة دى، ولو مافيش ميزانيه للاستفتاء يطلع خبر فى الجرايد تانى يوم إن اللمبة انتحرت علشان حست إنها مقصرة فى أداء واجبها القومى

فى مصر

أى عيل صغير ممكن يغير اللمبة بعد ما يسرق واحدة سليمة من سلم العمارة اللي جنبهم
فى إسرائيل

لما لمبة بتتحرق بيقولوا ان الإرهابيين الفلسطينيين هما اللى
حرقوها ويطلبوا من أمريكا تبعت لهم بدالها ألف لمبة جديدة وكمان
شوية صواريخ وطيارات علشان يقوموا بواجبهم فى الحرب على الإرهاب وينسفوا بيوت الناس اللى حرقوا اللمبة
فى اليابان
لو لمبة اتحرقت فى اليابان ايه اللى هيحصل....طبعا هيقوموا بالبحث فى اسباب احتراق اللمبات و اكيد فى النهايه هيوصلوا للمبة من نوع فريد ما بتتحرقش خالص....

فى فرنسا

لما لمبة بتتحرق بياخدوها يعملوها إزازة بارفان وطبعا كل الناس بتقلدهم بعد كده وتبقى موضة

فى أمريكا الجنوبية

لما واحد بتتحرق فى بيته لمبة بياخد جماعة من أصحابه وكام مدفع رشاش ويلبسوا صاعقة ويطلعوا على قصر الرياسة يعملوا انقلاب ويخلعوا الريس ويمسكوا الحكم ويكلفوا الجيش إنه يغير اللمبات المحروقة اللى عندهم كلها بسرعة قبل ما واحد تانى تتحرق له لمبة وييجى يخلعهم

فى الولايات المتحدة الأمريكية

لما واحد بتتحرق فى بيته لمبة بيتهموا تنظيم القاعدة بأنه السبب فى حرق هذه اللمبة وعلى هذا الأساس يتم استصدار قرار بالإجماع من مجلس الأمن تحت البند السادس من ميثاق الأمم المتحدة الذي يصرح باستخدام القوة لتنفيذ القرار ويتم إرسال قوة حربية من قوات التحالف (وكلها أمريكية فقط) مؤلفة من 12000 دبابة مدعومة بـ 243000 من مشاة البحرية و غطاء جوي مؤلف من 846 قاذفة مهمتها البحث والعثور على المجرم الإرهابي الذى فعل هذه الفعلة الشنيعة ويتم نشر قواعد عسكرية فى جميع بلدان الشرق الأوسط للبحث والتحري ويتم إرسال مفتشين دوليين للتأكد من أن جميع دول الشرق الأوسط لا يوجد بها لمبة محروقة ويتم احتلال أي دولة إذا تم التأكد من وجود لمبة محروقة بها باعتبار أن حكوماتها غير قادرة على إيجاد من يغير هذه اللمبة..


[ انا شخصيا ..عندي لمبات احتياطي في البيت..ولما بتتحرق اللمبة أغيرها..مابنسرقش لمبة من سلم العمارة اللي جنبنا ..أهلنا المصرين ربونا كدة ..ودي طريقة المصريين ..وهي دي مصر ]

مواضيع من نفس التصنيف



هناك 4 تعليقات:

  1. انا كمان لما اى لمبه عندنا بتتحرق بروح اشتري واحده ونركبها

    هو المصرين من وجهة نظر اخينا دا حراميه ولا ايه

    بس عموما البوست جامد

    ردحذف
  2. عشت ..اشكرك ..طبعا هو عايز يقول إن سمة المصريين السرقة..لأنه متأكد من عكس الكلام ده و إن مصر أم الدنيا شاء أو ابي ..و المصريين متفوقون في كل مكان

    ردحذف
  3. لا موضوع هايل بجد
    بس الا حكاية السرقه دى

    لكن ياريت كان يقولنا لو الواحد لمبة دماغه هى اللى اتحرقت يعمل ايه؟

    ردحذف
  4. عندي صورة حا احاول انشرها علي الموضوع..بتوري إن المصري لما اللمبة بتتحرق بيولع شمعة..وإحنا نورنا للدنيا كلها ..اشكرك علي زيارتك

    ردحذف

ليصلك جديد المدونة

ادخل بريدك الالكتروني