شقاوة شعب

(( الناس فاضية ... و الكلام ببلاش ... يبقى متتكلمش ليه ؟ ))
( من المعروف ) ... ان الشعب المصرى شعب مرفه جداً ...
و أكتر حاجة بتميز الشعب المصرى عن غيره من الشعوب ... انه شعب (( قاعد فى البيت )) ... لا شغلة ولا مشغلة ... يعنى ولا بيعمل ازدحام مرور ... ولا شباب مش عارفين يتجوزوا ... ولا ناس بتموت فى طوابير العيش ... العيش ؟؟ دا عاوز مقال لوحده ... ولا ... ولا ... ولا ... الخ ...
المشكلة (( الوحيدة )) فى مصر .... هى : ان الشعب مش لاقى حاجة يعملها .... يقوم يعمل ايه ؟؟؟
((( يطلع اشاعات )))
شعب متدلع بقى ...
لكن انا من هنا (( قدام الكمبيوتر )) ... بقول للى بيطلعوا الاشاعات دى : ... الاشاعات بتاعتكم خلاص اتكشفت ... و أنا هرد عليها
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
(( رغيف العيش فيه مسامير ))
فعلاً ... رغيف العيش فيه مسامير ... بس مسامير مفيدة للجسم ... لأن الدراسات (( اللى محدش عملها )) أثبتت ... ان الشعب المصرى عنده نقص فى الحديد ... و علشان نتدلع أكتر ... الناس دى مش بتحط أى مسامير ... دى مسامير ليها مميزات ... اهمها :
1- سهلة المضغ و الهضم ... (( علشان أسنان و معدة الشعب المصرى ))
2- مفيده للجسم ... (( حيث انها تمد الجسم بما يحتاجه من الحديد ))
3- ماركات عالمية ... (( ماهو مينفعش يحطوا أى مسامير كدة ))
و رغيف العيش نفسه ليه مميزات مش موجودة فى أى دولة تانية ... و أهمها :
1- مريح للمعدة ... (( تقولش محطوط عليه زبادى فواكه ))
2- نص قطره 10سنتيمتر ... (( دا الحجم الصغير حضرتك ))
3- بخمسة صاغ بس ... (( فى دول تانية سعر الرغيف فيها 5 دولار ... طبعاً مش هنقول مين هى الدول دى ))
(( و بعدين احمدوا ربنا ان احنا عندنا (( ديليفارى )) ... يعنى توصيل العيش للمنازل ... دا في دول تانية فيها نظام اسمه (( نظام الطوابير )) ... الناس بتموت فيه علشان تجيب عيش ... احمدوا ربنا على النعمة اللى انتوا فيها ... ))
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
(( الشباب اللى مش لاقى شغل ))
يا جماعة الشباب دى مش بتاعت شغل ... الواحد من دول عاوز السيجارة فى بقة ... و الموزة فى دراعه ... و يمشى طول النهار و الليل يصرف فى فلوس الراجل الغلبان اللى قاعد فى البيت ... طب ايه رأيكم بقى ان الشغل على قفا من يشيل ... و شباب الدول التانية بيعملوا (( مغامرات )) ... علشان يهربوا فى مراكب ... و ييجوا يشتغلوا عندنا ... و فى ناس منهم بتغرق كمان ...
و بعدين الشباب اللى بنطلوناتها واقعة منها دى حمل شغل ؟؟؟ ... طب اهو الشغل موجود ... بس عاوز اللى يدور عليه ...
و بعدين لو زنقت خالص ... ممكن تروح (( تشتغل فى حديد عز )) ... بطلوا حجج فارغة بقى
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
(( الاسفاف فى وسائل الاعلام ))
لأ بقى ... لأ بقى ... الاعلام بقى فيه طفرة كبيرة ... و اللى مش مصدق ... يتفرج على (( روتانا سينيما .. مش هتقدر تغمض عينيك )) ... ولا يسمع برنامج الاسطورة : (( اسامة منير ... انا و النجوم و هواك )) ... اللى بيناقش جميع القضايا المعاصرة التى تـ ... لا مش ده ...
بس فعلاً يا جماعة كل دى نماذج جميلة لناس (( فعلاً )) بتتحدى الملل ...
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
(( التعذيب فى السجون و المعتقلات ))
مافيش تعذيب فى السجون و المعتقلات ... لأن أصلاً مافيش سجون ولا معتقلات ... (( وسعت منى دى )) ...
بس الموضوع فيه سوء تفاهم ... الموضوع يتلخص فى :
(( عصاية فى بلكونة مواطن ... نزلت فى بلكونة المواطن اللى تحتيه ... و دخلت فى ... (( عينه )) .... و الظاهر كدة ان العصاية مكانتش ولا بد ... تقوم تطلع اشاعة ان مصر فيها تعذيب فى السجون و المعتقلات ... في ناس بتنفخ فى النار ... انا بحذركم ... و ربنا أشيل الدعم من على الملابس الداخلية ... و ابقوا البسوا هدومكم على اللحم ... و اهو اللبس على اللحم موضة ))
************************************************
(( أنا كدة خلصت كلامى ... ياريت الشعب بقى يعقل ... و يبطل الهزار البايخ ده ... و كفاية اشاعات بقى ))

مواضيع من نفس التصنيف