الجمعة، 23 مايو، 2008

بصراحة الواحد زهق..دماغنا وجعنا..دقيقة سكوت لله؟؟


أتصفح بعض المواقع إلاقي الحالة تسد النفس ..أقرا الجرائد علي النت ..(انا بطلت اشتري جرائد علي الاطلاق منذ أكثر من 10 سنوات)..تتسد نفسي..كله بيشتكي من كله و كله حاطط نفسه مطرح كله..وكله بيدافع عن كله..و كله نصب من نفسه محامي عن كله..نشوف اللقاءت الجماهيرية مع الناس تلاقيها حاجة تضحك في التلفزيون و علي الفضائيات..غير معبرة بالمرة..أنا لا أهاجم أحد ولا أدافع عن أحد ..لكن اللي مش واضح للناس بالمرة إن البلد في حالة تحول ..و اللي بيشرح الحالة دي بيتكلم بلغة غير مفهومة لمعظم الناس..ومش واخد باله من نسبة الأمية..الناس عايزة اللي يفهمها بالطريقة اللي تفهمها..ببساطة..مش بعجرفة..واللي بيشرح ده لازم برضه يفهم إنه موظف عند الشعب اللي بيخاطبه..و بياخد مرتبه من فلوسه..يعني لا زم ينزل لمستواه علشان يقدر يفهم و يساعده بدل ما يعارضة..طبعا مش بادعي إني فاهمة اللي ماحدش فاهمه ..لكن ده احساسي من متابعة السيرك اللي احنا عايشين فيه ..ومن اللي بينتهزوا الفرصة للهيجان و الفوضي ..ومن نظرة بسيطة ألاقي فيه ناس بتدعوا لإضراب في كل مناسبة و كل أسبوع و كل يوم بالذمة ده كلام ناس عاقلين..؟؟طيب بدل الاضراب إدرسوا الموقف ..حاولوا تفهموا الناس..حاولوا تضعوا حلول بديلة..أفهم إن هي دي الطريقة..وجهوا نداء مثلا للتجار الجشعين اللي بينتهزوا كل فرصة..وجهوا نداء من خلال تلاحمكم مع اصدقائكم و اهلكم بمقاطعة السلع اللي ارتفعت اسعارها بدون مناسبة.. دوروا علي الناس اللي بتعرف ربنا و لم ترفع الأسعار عاطل في باطل .. انشروا بيان بعناويتهم وأرقام تليفوناتهم.. دلونا نحصل علي طلباتنا منين من غير عناء..اعملوا مجاميع لمحمو الأمية ..لأن لما الناس تفهم تعرف تطلب حقها و تحل مشاكلها بعقل من بفوضي..الفوضي سمة الجاهل و فرصة للإنتهازي..ياعالم حرام عليكم ..ريحوا نفسكم و ريحونا منكم ..ياتساعدونا ياترفعوا ايديكم عننا ..و علي رأي بيرم التونسي..دماغنا و وجعنا ..دقيقة سكوت لله....

مواضيع من نفس التصنيف



0 comments:

إرسال تعليق

ليصلك جديد المدونة

ادخل بريدك الالكتروني