الاثنين، 12 مايو 2008

ادعي معايا وقول يا رب ما اقف في طابور ولا اتعامل مع موظف زرزور

الطابور في حياه الشعب المصرى هو شىء مقدس لان احنا شعب بلا فخر محترف طوابير
, احنا شعب (طابورجي) بطبعه من أول طابور الصباح في المدرسه لطابور العيش
لطوابير المصالح الحكوميه لطابور البطاله........
وعلي العموم لو حصل واضطريت تقف في طابور لمصلحه حكوميه فلازم يبقي معاك:
شمسيه أو طاقيه لزوم الحر والشمس ويا ريت قزازه ميه وكمان سندويتش
ولازم تاخد حبوب مهدئه كمان ! لانك لو كان من حظك تقابل الموظف النهارده
هيقابلك مقابله تحسسك بمدي اهميتك في الحياه واحتمال كمان يطلب منك لبن العصفور
فخده معاك احتياطي ! هي دي بقي متطلبات الطابور م الاخرلكن سيبوني بقي اتفرج معاكوا
علي المشهد الطابوري.........
طبعا الناس واقفه مترصصه ورا بعض كل واحد بيبص في قفا اللي قدامه
فجأه
وانت واقف يجيلك واحد عسل كده! ويسمعك القصه الخالده
(امه سابت ابوه واتجوزت وأبوه ركب الناقه وشرخ وأخته دخلت الجيش وهو بيصرف علي 40 اخ)
وطبعا لازم تبقي شهم وجدع وتديله دورك علي الرغم من انك لو بصيت في عينه
هتحس اد ايه هو صادق!وممكن واحد تاني يقوللك لو سمحت هاسأل سؤال
واحد بس كلمه واحده لو سمحت , ويا سلام لو سمحتله الكلمه
هتبقي الف كلمه والسؤال هيبقي استجواب , أما بقي لو كان اللي قدامك جدع طيب (أهبل يعني)
يبقي اليوم مش هيعدي لآنه هيسمح لآي واحد انه ياخد دوره !
المهم بقي بعد رحله الكفاح دي لو وصلت للموظف هيبصلك من فوق لتحت ويحسسك انك حشره
واقفه قدامه مع ان ممكن اوى تكون انت احسن منه ,
وبعدين يسمعك الكلمات الخالده :عدي علينا كمان اسبوع
ياااااااااااااااااااااااااااااااااااااااااه
احساس مليان بالسعاده هاقف في طابور تاني مش ممكن..........
كتير ببص لاي طابور في مصر وبلاقيه مدور اه والله العظيم مدور
لدرجه تخليك تتصور ان ده شكل معماري ورثناه من جدودنا الفراعنه ....
فتلعن كل ده في سرك وتتمني تعيش لحد ما تشوف طوابير مصر عموديه زى كل دول العالم
المحترمه بس انا وبكل ثقه وايمان ببشرك ان ده مش هيحصل
لان الطابور هو ابسط تجسيد لقيمه النظام .. قيمه احترام جهود وحقوق الغير ...
اللي ييجي الاول يخلص مصلحته ويمشي الاول , هي دي الصوره المثاليه للطابور
زى ماهي الصوره المثاليه للمجتمع ....... والحمد لله ان الصورتين بعاد كل البعد
عن مصرنا الحبيبه !
ففي مصر تروح الطابور بدري وتستني بالساعات وييجي (ابن الباشا)
بعدك بزمن ويخلص مصلحته في ثواني ويمشي
وتفضل انت مستني برضه!وفي مصر تشتغل وتتعب وييجي (الباشا)
بقي بنفسه وياخد كل الربح والتكريم وتفضل انت برضه مستني!
عشان كده بقوللك
ادعي معايا وقول يا رب ما اقف في طابور ولا اتعامل مع موظف زرزور

مواضيع من نفس التصنيف



هناك تعليق واحد:

  1. هههههههه

    وانا كمان بدعي معاك يا ربي ما أوقف في طابور عالاطلاق

    طابور في المدارس طابور في شرية الاكل طابور في المقصف طابور عند الموقف ( اشارة المرور ) طابور عند التسجيل طابور عند المراجعة طابور عند انتظار سيارة

    يييييييييييه

    ناس حضارية بشكل فزيع

    بس حضارية حضارية حضارة تقلييد يا ريتو زابط !!

    ردحذف

ليصلك جديد المدونة

ادخل بريدك الالكتروني