انا مش زعلانة منك انا زعلانة من الدنيا قوى يا فاطمة

ده كان اول موضوع كتبته عالانترنت فى الفيس بوء كان يوم 13 ابريل 2008 وبما انى محدثة نعمه قصدى محدثة كتابة فمش عاوزة تريقه , وفى البدء كانت الكلمة ةةةةةة
اخواتى واخواتى فى اللهالسلام عليكم ورحمة الله وبركاته, مش عارفه ليه اول مرة من ساعة ما اشتركت فى الفيس بوك من حوالى 5 اشهر احس انى فعلا عاوزة اشارك اوى فى موضوع واسمحولى انى بجرب فيكم واتمنى انكم تشاركونى بافكاركم وارائكم دا طبعا لو الموضوع عجبكم .حاستعير كلمة من فيلم " عن العشق والهوى " استوقفتنى وقعدت افكر فيها كتير وهى لما منى زكى قالت لغادة عبد الرازق ( انا مش زعلانة منك انا زعلانة من الدنيا ) هو احنا يا جماعة فعلا زعلانين من الدنيا ؟ يعنى زعلانين من ربنا ؟ كل الكلام والشكوى والمرارة والاكتئاب وعدم الثقة والحزن والتوهان الى احنا فيه فى حياتنا ده عشان احنا زعلانين من ربنا وحاسين اننا مظلومين ومش واخدين حقنا فى بلدنا ولو شباب وعاوزين نتجوز ومش لاقيين ولو فى شغلنا وبنقابل رشاوى وكوسة ولو فى بيتنا لاقيين عقوق ابناء وتعاسة مابين الازواج ولو فى حقوقنا السياسية مش لاقيين ولو وصلنا اننا بنقتل بعض عشان رغيف العيش والابن بيقتل ابوه والاب بيقتل عياله عشان مش لاقى يوكلهم يبقى اكيد فيه حاجه غلط يعنى باختصار احنا ساخطين ومش قابلين بالى احنا فيه وشايفيين ان حقوقنا ضايعة وكل حاجة مش تمام ودا شعور اغلب الناس فى هذا الزمان. طب يا جماعة انا قعدت مع نفسى قعدة جامدة قوى وسالت نفسى لو انتى احساسك كده ماسالتيش نفسك ليه؟ ماسالتيش نفسك انتى قدمتى ايه عشان تاخدى ايه ؟ هل انتى عاملة الى عليكى وزيادة عشان كده عاوزة كل حاجة تبقى واو برفكت وحتى لو كنتى عاملة الى عليكى وزيادة ودا مش حاصل طب لو كان دا بلاء من ربنا مش حتستحمليه ؟ دى مش دعوة للتخاذل بالعكس انا بادعو كل الناس وانا اولكم لو انتم بجد زهقتوا من الى انتو فيه لازم تتغيروا من جواكم وماحدش يبص لغيره ابدأ بنفسك لو كل انسان غير من نفسه وعمل الى ربنا بيقول عليه عمره ماحيكون مهموم او زعلان او ضميره واجعه عشان حيكون عارف انو عمل الى عليه وان الباقى كله فى ايد ربنا ربنا الى مابنفتكرهوش الا فى ساعات الشدة والكرب لكن طول ماحنا مبسوطين وحياتنا تمام مش بنفكر فيه خالص وعلى فكرة دا مش كلامى دا كلام ربنا وعشان ماطولش عليكم حاستعير مقطع من اغنية الفنان رضا مندور لبرنامج خدعوك فقالوا " عايز تعيش وماتندمشى عالسنة والقران امشى عنيك تشوف الصورة اوضح " انا بجد نفسى نشوف الصورة اوضح نفسى نعرف ان الدنيا دى مجرد رحلة فى قطر الى حييجى محطته حينزل مش حنلحق فى الرحلة دى نتخانق ونزعل ونكتئب اكيد لو عملنا كده الرحلة دى حيبقى ليها طعم تانى لو ابتدينا نفكر اننا بدل ما نكره نحب وبدل ما نلوم نطنش وبدل ما نحسد نتمنى الاحسن ونتعلم ندعى ربنا عشان احنا بنحبه مش عشان عاوزين منه حاجة نتعلم نعمل الى علينا عشان طمعانين فى الجنة مش عشان خايفين من النار. يارب اكون وصلت الصورة عشان تكون احلى واوضح ومنتظرة تعليقاتكم اخواتى واخواتى فى الله السلام عليكم ورحمة الله وبركاته

مواضيع من نفس التصنيف